افضل مواقع تصحيح الكتابة الانجليزية

هنتكلم معاكم النهاردة عن Me و Myself و i

اللى هما  ضمائر بيعودوا علي اللي بيتكلم .. بس  امتى استخدم كل حاجة فيهم وأكون " برنس " من غير ما اتلخبط فيهم ؟! 

نبدأ بـ Me :

me بتعبر عن ثلاث حالات

•اول حالة عن اللي بيتكلم اذا كان مفعول به مباشر" Direct Object "

زي مثلاً " He kicked me " هنا عمنا ده اتضرب بمعني تاني " الفعل وقع عليه "

•الحالة التانية هي الـ " Indirect Object " او المفعول الغير مباشر

يعني اية الكلام ده ؟!
خد عندك المثال ده و هنفهمه سوا " he gave me the book " ,في الحالة دي الكتاب هو المفعول المباشر و انا " ME " المفعول به الغير مباشر...

•اما تالت حالة هي الـObject of a preposition

هو يعني اية preposition دي اصلا ؟ بين قوسين حروف الجر .
زي دول كدا : " with-within-without-beside-to-of-off-on-onto "
بص معايا المثال ده : " he gave the book to me " وهنا المفعول جه بعد to اللي هي الـ preposition اللى قولنا عليه فاصبح مفعول لحرف الجر وتعالوا نشوف مثال تاني : "Jennifer sits beside me in class"هنا الـpreposition هو beside

اما " I " 

ودايما بتعبر عن اللى بيتكلم اذا كان هو الفاعل نفسه" I eat a lot "وهنا انا الفاعل بتكلم عن نفسي وفي حالة تانية لـI بتستخدم فيها و هي لما بتكون جاية كأسم مسند زي مثلا : " The best swimmer is I "
ياعم استني متكروتناش انا مش فاهم يعني اية اصلا اسم مسند 
بص يا عمنا الاسم المسند ده او " Predicate Nominative "
بيكون اسم او ضمير بيجي ورا الفعل نفسه عشان يوصفه و بيجي ورا الافعال المتصلة بمعني...بص كدة للمثال اللي فات " the best swimmer is I "
في الحالة دي Is هي الفعل المتصل، هنا I الفاعل اتوصف بأنه best swimmer 

◄اما بقي التالتة اللي راشقة في اي حاجة هي Myself 

ودي يا سيدي ضمير منعكس " Reflexive Pronoun "
اعتبر اننا مقولناش كلمة ضمير منعكس دي اصلا 

ابسطهالك 
بنستخدم Myself لما يكون الفاعل و المفعول هما نفس الشخص بمعني:
"I want to hit MYSELF in the head " هنا I هو الفاعل و Myself المفعول و الاتنين نفس الشخص اصلا  ,ما ينفعش اقول " I want to hit me in the head !!
لأن me بتسخدم لو واقع عليا فعل خارجي مش من الفاعل نفسه 

الحالة التانية اللي myself بنستخدمها فيها بتكون للتأكيد "To Emphasize "
انت بتستعملها عشان تأكد علي اهمية نفسك ..
زي مثلا اما تقول " I don't like this idea myself " انا نفسي الفكرة دي مش عجباني او ممكن " I myself will do the work "  يعني انا هعمل الشغل ده بنفسي بدون مساعدة اى حد  ..

اخر حاجة خليك متأكد لو انت بتجتهد انك تتعلم English وبتمارس دا كل يوم من خلال انك بتسمع وتقرأ وتكتب وتتكلم .. مع الممارسة المستمرة هيحصل Sense معين بينك وبين الـ English هتعرف تفرق بيه بين الكلمات اللى شبه بعض فى المعنى وامتى تستخدم كل واحدة فيهم فى مكانها المناسب